"Abale ndi alongo anga, mukakhala ndi mitundu yambiri ya mavuto, muyenera kukhala odzala ndi chimwemwe ..." Yakobo 1:2.
Yakobo amalankhula pano za moyo umene timagonjetsa mkwiyo, kuwawidwa mtima, kudandaula etc m'mayesero athu onse osiyanasiyana.
Kodi munamvapo za chimwemwe choterocho mkati mwa mayeseroo? Ngati mumvetsera maumboni a Akhristu ambiri, mudzamva za nthaŵi zonse zimene anapereka ku uchimo m'mayesero a mitundu yonse. Mayesero awo onse ali pafupifupi temberero chifukwa chakuti kaŵirikaŵiri amagonja ku uchimo. Ndipo chifukwa chakuti safuna kukhala ndi chikumbumtima choipa, ayenera kupempherera chikhululukiro pa zonsezi. Koma kodi zimenezi n'zimene Yakobo akutanthauza pamene ananena kuti tiyenera kukhala osangalala kwambiri pa mayesero athu? Ayi, ayi ndithu! Iye amatanthauza kuti tiyenera kugonjetsa mkwiyo wathu, kudandaula kwathu, kusakhulupirira kwathu etc m'mayesero athu. Ndiyeno, pamene pali mayesero ambiri, padzakhala chipambano chambiri pa machimo ameneŵa, ndipo chotulukapo chake chidzakhala chimwemwe chosatha.
Kukodwa mu mchitidwe wochimwirachimwira ndi kufunafuna chikhululukiro
Munthu amakwiya chifukwa chakuti wina wamulakwira. Iye amaiŵala zonse ponena za mmene Mkhristu ayenera kukhalira, ndipo amapsa mtima ndi mawu ndi zochitika. Chiyesocho chinali chachikulu kwambiri ndipo anagonjera mkwiyo wake. Koma kenako kumabwera Mzimu wa choonadi ndipo umakuonetsa kuti ndi kukwiya ndi tchimo , monga momwe zalembedwera m'mawu a Mulungu. Ndipo kenako ayenera kupempherera chikhululukiro cha machimo.
N'chimodzimodzinso ndi kukayikira kwake koipa ndi kufuna kusangalatsa anthu, ndi machimo ena onse omvetsa chisoni amene akuvutika nawo. M'chiyeso chilichonse amagonja ku uchimo ndiyeno palibe chimwemwe chilichonse m'mayesero onse. Iye sangakhale wodzala ndi chimwemwe ngakhale kuti nthaŵi zonse amadzimvera chisoni pambuyo pake.
Pa mtanda kapena pansi pa mtanda?
Baibulo lili ndi malangizo abwino kwambiri kwa ife, koma zili ngati kuti anthufe ndi agonthi. Pano pali chitsanzo: "Tikudziwa kuti moyo wathu wakale [mkhalidwe wathu wakale wokonda kuchita zoipa] unafa ndi Khristu pamtanda. Zimenezi zinali choncho kuti uchimo wathu ukhale wopanda mphamvu pa ife, ndipo tisakhale akapolo a uchimo." Aroma 6:6.
Vesi limeneli lakhala lopotoka kwambiri mwa kulalikira, kulemba, ndi nyimbo moti masiku ano limamveka chonchi: "Pafupi mtanda ndi pamene ndikufuna kuima."
Kodi m'Baibulo ndi pati pamene akunena za kuima pafupindi mtanda? Sindinawerengepo zimenezi.
Chifukwa chake tingakhale odzala ndi chimwemwe pamene tikumana ndi mayesero
"Mukudziwa kuti zinthu zimenezi zikuyesa chikhulupiriro chanu. Ndipo zimenezi zidzakupatsani kuleza mtima. Lolani kuleza mtima kwanu kudzisonyeza bwino lomwe m'zimene mumachita. Pamenepo mudzakhala wangwiro ndi wathunthu. Mudzakhala ndi zonse zomwe mukufuna." Yakobo 1:3-4. M'mayeseroeso athu onse, ngati tigonjetsa uchimo m'nthaŵi ino pmene tikuyesedwa, tidzakhala angwiro kotheratu. Koma ngati tilephera m'mayesero ndipo tichimwa, pamenepo tili kutali ndi kukhala angwiro kotheratu. Ndipo sitidzakhala ndi chimwemwe cha wogonjetsa.
Mulungu amatitsogolera ku "adani" athu—amene ndi mkhalidwe wathu wokonda kuchita zoipa, m'thupi lathu. Timapezeka m'mayesero ambiri omwe timayesedwa kuti tichimwe, koma mayesero amenewa amatipatsa mwayi wopeza chipambano chambiri pa machimo amenewa, ndipo zimenezo zimatipatsa chimwemwe chachikulu. Chimatibweretseranso chiyamiko kwa Mulungu ndi ulemu kuchokera kwa anthu.
Werengani zambiri: "Momwe mungadutse m'munda wa mabomba a thupi lathu"
"Ndapachikidwa ndi Khristu"
Achinyamata amva zambiri za "tchimo ndi chisomo" chosadziwika bwino chimenechi komanso kulalikira za "kuchimwa pansi pa chisomo" moti amaona kuti n'zosatheka kumvetsa "Chikhristu" choterechi. Koma aliyense akhoza kumvetsa mawu ngati awa: "Ndapachikidwa ndi Khristu; salinso ine amene ndimakhala, koma Khristu amakhala mwa ine." Agalatiya 2:20.
Paulo sakunena kuti: "Ndikukhala pansi pa mtanda; Ine sindinapachikidwe."
Ayi, zimenezo sizingatheke. Ngati tikufuna kupeza chimwemwe tikabwera m'mayesero amtundu uliwonse, ndiye kuti maganizo athu akale omwe akufuna kuchimwa ayenera kukhala "pamtanda", pomwe alibenso mphamvu iliyonse pa ife. Sitifunikira kuchita zomwe "moyo wathu wakale", chikhalidwe chathu chochimwa, chimatiuza kuti tichite, koma tikhoza kuchita zomwe Khristu akutiuza kuti tichite.
Werengani zambiri: "Kodi ndinganene bwanji kuti ndapachikidwa pamodzi ndi Khristu?"
Motsogoleredwa ndi Mzimu
Sitingakhale ndi moyo monga momwe tinachitira tisanabadwenso. Zalembedwa kuti: "Ndipo ngati Khristu ali mwa inu, ndiye kuti thupi lafa chifukwa cha uchimo, koma Mzimu ndi moyo chifukwa cha chilungamo." Aroma 8:10. Tsopano Mzimu wa Mulungu uyenera kutsogolera miyoyo yathu, ndipo Iye adzatitsogolera ife mu choonadi chonse.
Tikabwera koyamba kwa Yesu Khristu, timabwera ngati ochimwa omwe amalapa, omwe ali ndi chisoni chifukwa cha machimo awo; koma ngati anthu apitirize "kuchimwa ndi kulapa" kwa zaka 20 kapena 30, chimenecho ndi chiphamaso. Pamenepo iwo sali kwenikweni ndi chisoni pa machimo awo. Amachimwa ndipo amafuna kukhala ndi chisomo kuti akhululukidwe, koma safuna kukhala ndi chisomo chomwe chidzawaphunzitsa kunena kuti "Ayi" ku uchimo. (Tito 2:11-12.) Kodi tipitirize kuchimwa kuti Mulungu atipatse chisomo chowonjezereka? Ayi ndithu! (Aroma 6:1-2.)
Pamene "moyo wathu wakale", maganizo athu akale, amaikidwa pamtanda—mwa chikhulupiriro—ndiye kuti timasiya "kuchimwa ndi kulapa mobwerezabwereza". Ndipo tidzagonjetsa tchimo lonse limene tikuyesedwa m'mayesero osiyanasiyana.
Pamenepo tingakhale odzala ndi chimwemwe pamene tiloŵa m'mitundu yambiri ya mayesero!