Chikondi chadyera
Chikondi chadyera chimatanthauza kuti zonse za "Ine", "Ine" ndi "zanga". Munthu amene chikondi chake chili chongoganizira za iye mwini ali ngati kangaude pakati pa ukonde wake, amagwira ulusi wonse m'manja mwake. Mu chilichonse amaziganizira iye mwini. "Ine" ndine mfumu, "Ine" ndine mulungu, "Ine" ndiyenera kukondedwa, kulemekezedwa ndi kutamandidwa —apo ayi mudzamva mkwiyo "wanga". "Ine" sindidzapereka chilichonse kwaulere. "Ine" choyamba ndiyenera kukhala otsimikiza kuti "Ine" ndidzalipidwa mokwanira ndisanachite chinachake. "Ine" ndikufuna zonse ndipo ndili ndi ufulu pa chilichonse.
Chikondi chadyera chimayika khama lake lonse mu zomwe "ine" ndikufuna. Palibe kuyesayesa kwake kumene kumatuluka kwa ena. Zonse ndi za ine ndekha.
Chikondi cha Mulungu
Chikondi cha Mulungu chimalola dzuŵa lake kuŵala pa olungama ndi osalungama. Amatumiza mvula pa oipa ndi abwino. Ubwino Wake wonse umatuluka—palibe chabwino kwambiri chomwe chingaperekedwe. Monga momwe dzuwa limawala mopanda kukondera pa aliyense, momwemonso chikondi cha Mulungu chimawala kwambiri ndi mwa chikondi ndipo chimatipatsa zonse zomwe tikufunikira kuti tikhale ndi moyo wa Umulungu (2 Petro 1:3).
Chikondi chadyera chimaononga
Munthu wodzazidwa ndi chikondi chadyera amasamala za iye yekha. Chilichonse chimangokhala cha iye mwini. Chifukwa chakuti samasamala za zinthu ndi anthu ena omwe amamuzungulira, posapita nthawi amakodwa mu msampha wa mphamvu yowononga ya chikondi chadyerachi - chomwe ndi Satana mwiniwake. Chikondi chadyerachi chomakodwa mu msampha wake ndipo chimaononga m'njira yowopsa.
Chikondi cha Mulungu chimapereka ndi kulenga moyo
Mzimu Woyera watsanulira chikondi cha Mulungu m'mitima yathu. Chikondi chimenechi nthawi zonse chimafunafuna njira zopangira zabwino kwa ena. Chikondi cha Mulungu chimatipatsa dziko lonse lapansi kuti tigwire ntchito, koma Chikondi chadyera chikapeza munthu mmodzi wotchedwa, "Ine" uyu, chimakamuononga munthuyo kotheratu.
Chikondi cha Mulungu chimalakalaka kugawana ndi kupereka; chimapanga moyo ndi chimwemwe kulikonse kumene chili. Aliyense "amakonda" chikondi ichi, koma Chikondi chadyera chimadedwa kulikonse.
Ngati tikufuna kuthandiza anthu, tiyenera kukhala okhoza kuona zimene anthu akufuna. Tikamathandiza anthu momasuka komanso mopanda dyera, amadabwa kwambiri. Amayang'ana pang'ono chikondi chimene chimapereka ndipo safuna choposa ichi. Chikondi chimenechi n'chosiyana kotheratu ndi chikondi cha padziko lapansi chimene anachizolowera. N'chifukwa chake kwalembedwa kuti ubwino wa Mulungu umatichititsa kumva chisoni chifukwa cha machimo athu ndi kulapa. Timakumana ndi chikondi chomwe chimachokera kunja kwa ife eni—chimene chili chachikulu kwambiri kuposa chikondi chathu chadyera.
Chikondi ichi chili ndi zotsatira zodabwitsa: Anthu omwe amakumana ndi chikondi ichi, amafunanso kukhala nacho. Chikondi cha Mulungu chimabzala chinachake cha chikhalidwe Chake mwa ife. Timapatuka pa chikondi chadyera kulunjika ku chikondi cha Mulungu ndiyeno timangofuna kuchita ndi kugawana zinthu zimene chikondi cha Mulungu chatipatsa.
Kugawana chuma chakumwamba
Munthu amene ali wolemera m'dzikoli, ngati ali wokoma mtima, angachite zabwino zambiri ndi kubweretsa chimwemwe kwa anthu ambiri. Mofanananso, munthu amene wasonkhanitsa chuma mwa Mulungu angagwiritsire ntchito chuma chimenecho kudzetsa chimwemwe kwa ambiri. Ngati chuma cha padziko lapansi chingasangalatse anthu kwa kanthaŵi m'dzikoli, kodi nanga chuma chakumwamba chimenechi chingatisangalatse koposaposa kotani kwa muyaya?
Mudzapeza chikondi cha Mulungu pamene mukufunadi kukhala nacho ndi mtima wanu wonse. Momasuka talandira, ndipo momasuka tikhoza kugawana ndi ena.