Kukhala ndi dzina m’dziko lino ndi msampha
“Ine ndakupatsani ulamuliro woponda pa njoka ndi zinkhanira, ndi kugonjetsa mphamvu zonse za mdani, palibe chimene chidzakupwetekani. Komabe musakondwere chifukwa mizimu yoipa inakugonjerani, koma kondwerani chifukwa mayina anu analembedwa kumwamba.” Luka 10:19–20.
Mungathe kudzipangira mbiri m’dzikoli pochita zinthu zazikulu, ngakhalenso ntchito zabwino. Koma mukapitiriza kuganizira zimenezi ndi kudzitama nazo, muli pangozi yaikulu yotaya dzina lanu kumwamba.
Agiriki ena ankafuna kuona Yesu. Iwo anamva za zozizwitsa zake, ndipo tsopano ankafuna kuona munthu wamkulu ameneyu. Koma Yesu anayankha kuti: “Zoonadi, Ine ndikukuuzani kuti,'Mbewu ya tirigu imakhala imodzi yokha ngati sikugwa m’nthaka ndi kufa. Koma ngati ifa, imabereka mbue zambiri.' Munthu amene amakonda moyo wake adzautaya, pamene munthu amene amadana ndi moyo wake m'dziko lino lapansi adzawusungira ku moyo wosatha.” Yohane 12:24–25.
Yesu ankadana ndi kutchuka m’dzikoli ndi kusiriridwa ndi anthu. Iye ankadziwa kuti umenewu unali msampha wochokera kwa mdierekezi wofuna kumulekanitsa ndi Mulungu. Umboni wake unali wakuti: “Ine sindilandira ulemu kuchokera kwa anthu.” Yohane 5:41. Ndikayamba kuganizira za dzina langa, ndimadzitumikira ndekha osati Mulungu.
Wokonda Yesu kapena wophunzira wake?
Yesu akunena motsogolanso pa Yohane 12:26: "Aliyense amene atumikira Ine ayenera kunditsata; ndipo kumene ndili Ine, wotumikira wanga adzakhalanso komweko. Atate anga adzalemekeza amene amatumikira Ine.” Yesu sankafuna anthu omusirira; ankafuna ophunzira omwe ankamutsatira.
Yesu anatumikira Mulungu, ndipo ntchito Yake inali kulemekeza Atate. Choncho, pamene ankakumana ndi mayesero Ake aakulu kwambiri, anafuula kuti: “Atate, lemekezani dzina lanu.” Yohane 12:28. Chofunika chinali chakuti ulemerero wa Mulungu—chikondi Chake ndi makhalidwe Ake abwino—zionekere m’mayesero Ake. Umenewo ndiwo unali ulemerero weniweni wa Mulungu, osati zozizwitsa zonse. Chikondi cha Mulungu sichinaunikirepo mwamphamvu chonchi monga pamene Yesu anafuulira pamtanda kuti, “Atate, akhululukireni, pakuti sakudziwa zimene akuchita.” Luka 23:34.
Umu ndi mmene tingamutumikire Iye. Tsopano ifenso tidzaonetsa ulemerero Wake mwa kufa ku chifuniro chathu ndi zokhumba zathu m’mayesero athu onse, ndiponso mwa kubala zipatso zambiri—chipatso cha Mzimu (Yohane 15:8). Pamenepo sitidzakhala tokha, koma tidzakhala ndi chiyanjano ndi Atate ndi Mwana, ndiponso ndi anthu onse a Mulungu amene amakhala moyo womwewo. Koma ndikayesa kusunga moyo wanga ndi ulemu wanga, ndidzakhala ndekha ndipo ndidzachotsedwa m’chiyanjano chaulemererochi.
Satana anapatuka kwa Mulungu chifukwa ankafuna kukhala wodziimira payekha, wopanda Mulungu. Tsopano akuyesera kutikopa kuti titsatire naye njira yolakwika yomweyo. Yesu akunena pa Yohane 5:43: “Ine ndabwera m’dzina la Atate anga, ndipo inu simundilandira Ine; koma wina wake akabwera m’dzina la iye mwini, inu mudzamulandira.” N’chifukwa chiyani analandira anthu amene anabwera m’dzina lawo? Chifukwa ankachita chidwi ndi zimenezo ndipo ankaganiza kuti zinali zabwino kwambiri—kukhala munthu wodziimira payekha ndiponso kukhala ndi mbiri.
“Anthu wamba” okhala ndi dzina kumwamba
Pemphero lochokera pansi pa mtima la Yesu pa Yohane 17:11 linali lakuti, “...Atate Woyera, atetezeni ndi mphamvu za dzina lanu,. Dzina limene munandipatsa Ine, kuti iwo akhale amodzi monga Ife tili amodzi.” Dzina limene Yesu analandira kwa Atate ake linali lakuti, “Mwana wanga wokondedwa,” ndipo kuuka kwake kwa akufa kunaonetsa kuti Iye ndi Mwana wamphamvu wa Mulungu (Aroma 1:4).
Koma Yesu anadzitcha Mwana wa Munthu. Yohane akunena mu 1 Yohane 3:1-2: “Taonani kukula kwake kwa chikondi chimene Atate anatikonda nacho, kuti titchedwe ana a Mulungu! Ndipo n'chimene ife tili!. N'chifukwa chake dziko lapansi silitidziwa chifukwa silinamudziwe Iye. Abale okondedwa, tsopano ndife ana a Mulungu, ndipo sichinaoneke chimene tidzakhala. Koma tikudziwa kuti Yesu akadzaonekera, tidzafanana naye, pakuti tidzamuona Iyeyo monga momwe alili.”
Tsopano tikukhala m’dziko lino ngati anthu wamba opanda dzina kapena ulemerero. Koma ngati titsatira Ambuye wathu mokhulupirika ndi kukhala naye moyo wobisika umenewu, tidzaonekera pamodzi naye mu ulemerero monga ana a Mulungu. Tidzaonekera pamodzi naye pamene Wokana Khristu adzaphedwa ndi mpweya wotuluka m’kamwa mwa Yesu ndi kuwonongedwa ndi kubwera kwake (2 Atesalonika 2:8). Ndipo chilengedwe chonse, chimene chikuyembekezera mwachidwi kuvumbulutsidwa kwa ana a Mulungu, chidzamasulidwa ku ukapolo wa chivundi ndipo chidzagawana nawo ufulu waulemerero wa ana a Mulungu (Aroma 8:19-21). Kumasuka kwa iwe mwini ndi ku dzina lako ndi ufulu waukulu ndiponso waulemerero.
Tisunge nthawi zonse chimwemwe chosavuta ichi, kuti mayina athu alembedwe kumwamba. Chimwemwe chathu chifukwa cha kuitanidwa kwathu kwakukulu kwakumwamba ndi kusankhidwa kwathu chiyenera kukhala chachikulu kwambiri moti tidane ndi kunyoza chikhumbo chilichonse chofuna kukhala munthu wofunika kapena kukhala ndi dzina padziko lapansi.