Uthenga Wabwino wa Mulungu
“Ndine Paulo, mtumiki wa Khristu Yesu, woyitanidwa ndi Mulungu kukhala mtumwi. Ndinapatulidwa kuti ndilalikire Uthenga Wabwino wa Mulungu, umene analonjeza kale m’Malemba Oyera kudzera mwa aneneri ake. Uthengawu ndi wonena za Mwana wake amene mwa umunthu wake anali wochokera mwa Davide. Iyeyu ndi amene anatsimikizidwa kukhala Mwana wa Mulungu mwa mphamvu za Mzimu Woyera pamene anauka kwa akufa. Kudzera mwa Ambuye athu Yesu Khristu..” Aroma 1:1-4.
Aneneri a m’Chipangano Chakale analosera za Yesu pa Yesaya 7:14-15, pa Yesaya 9 ndi pa Yesaya 53. Timawerenganso za Iye pa Mika 5, ndiponso m’malo ena ambirimbiri. M’Chipangano Chatsopano tingapeze maulosi okhudza Iye pa Luka 24:26-27, pa Machitidwe 18:28, pa 1 Petro 1:10-13, ndiponso m’malo ena.
M’buku la Aroma 1:1-4, Paulo akufotokoza mwachidule uthenga wabwino wa Mulungu wonena za Yesu m’magawo awiri: kuti Iye ndi ndani monga mwa thupi, ndi kuti Iye ndi ndani monga mwa Mzimu. Tikachotsa kapena kusintha mbali imodzi mwa zimenezi, ndiye kuti siulinso uthenga wabwino wa Mulungu.
Kodi zikutanthauza chiyani kuti Iye anali mbadwa ya Davide monga mwa thupi? Zimangotanthauza ndendende zimene mawuwo akunena. Timadziwa za Davide ndi mbadwa zake. Paulo anali wa mtundu womwewo. (Ahebri 2:16.) Paulo akunena za iye mwini kuti, “*Ine ndikudziwa kuti mwa ine mulibe kanthu kabwino, ndiye kuti m’thupi langa lauchimo.*” Aroma 7:18. Choncho, Yesu anali ndi thupi limeneli, umunthu umenewu.
Yesu “*anatsimikizidwa kukhala Mwana wa Mulungu … monga mwa Mzimu wa chiyero mwa kuuka kwake kwa akufa.” Izi nazonso sitingazisinthe. Choncho funso n’lakuti: Pamene Iye anabwera padziko lapansi m’thupi lochokera ku m’badwo wa Davide, kodi anabwera ndi chidzalo chonse cha Mulungu mu Mzimu Wake? Yankho lake ndi “Ayi,” chifukwa kwalembedwa kuti, “… Iyeyu, pokhala Mulungu ndithu, sanatenge kufanana ndi Mulungu kukhala chinthu choyenera kuchigwiritsitsa. Koma anadzichepetsa kotheratu nakhala ndi khalidwe ngati la kapolo ndi kukhala munthu ngati anthu ena onse. Ndipo pokhala munthu choncho, anadzichepetsa yekha ndipo anamvera mpaka imfa yake, imfa yake ya pamtanda.*” Afilipi 2:6-8.
Nthawi zambiri amanena kuti Iye anali Mulungu weniweni komanso Munthu weniweni. Koma zimenezi si zoona ngati zikutanthauza kuti anabwera ndi chidzalo chonse cha Mulungu pamene anabwera padziko lapansi ali m’thupi lochokera m’banja la Davide. Ndipo zimenezi sizikugwirizananso ndi zimene timaŵerenga pa Ahebri 12:2, “... *tiyang'anitsitse Yesu, amene ndi woyamba ndi wotsiriza wa chikhulupiriro chathu.”*
Werengani zambiri apa: N’chifukwa chiyani Yesu anayenera kufa pamtanda?
Zimene zinachitika mwa Yesu m’masiku amene anali m’thupi
Mu Ahebri 5:7-10 timawerenga kuti, “Yesu, pa nthawi imene anali munthu pa dziko lapansi pano, anapereka mapemphero ake ndi zopempha mofuwula ndi misozi kwa Iye amene akanamupulumutsa ku imfa, ndipo anamumvera chifukwa anagonjera modzipereka. Ngakhale Iye anali Mwana wa Mulungu anaphunzira kumvera pomva zowawa. Atasanduka wangwiro kotheratu, anakhala gwero la chipulumutso chosatha kwa onse omvera Iye. Ndipo Mulungu anamuyika kukhala Mkulu wa ansembe, monga mwa dongosolo la unsembe wa Melikizedeki.”
Timawerenga kuti mapemphero Ake anamvedwa. Choncho, sakanapempha kuti apulumutsidwe ku imfa Yake pamtanda wa Kalvari, chifukwa anayenera kuvutika imfa imeneyo kuti ayanjanitse zinthu zonse ndi Mulungu (Akolose 1:19-22; 2 Akorinto 5:19).
“Pakuti ngati inu mukhala monga mwa khalidwe lauchimo, mudzafa …” Aroma 8:13. Chifukwa cha imfa imeneyi, Iye anapemphera mokweza ndi misozi kwa Iye amene akanatha kumupulumutsa ku imfa. Mapemphero ake anamveka, ndipo imfa sinathe kumugwira. Apanso tili ndi mbali zonse ziwiri za uthenga wabwino.
Mu Ahebri 2:14-15 timawerenga kuti, “Tsono popeza kuti anawo ndi anthu, wokhala ndi mnofu ndi magazi, Yesu nayenso anakhala munthu ngati iwowo kuti kudzera mu imfa yake awononge Satana amene ali ndi mphamvu yodzetsa imfa. Pakuti ndi njira yokhayi imene Iye angamasule amene pa moyo wawo onse anali ngati akapolo chifukwa choopa imfa.”
Mu Genesis timawerenga mmene njoka inanamizira Hava ndi kumuuza kuti adzakhala ngati Mulungu, n’kudziwa zabwino ndi zoipa. Inayesa Hava pomulonjeza ulemerero umene inati akanaupeza mwa kusamvera; koma zotsatira zake zinali imfa. Yesu anayamba ndi imfa, ndipo kudzera mu imfa anawononga amene anali ndi mphamvu ya imfa. Anabwera kudzathetsa zilakolako ndi zokhumba, zimene zimayambitsa kuwonongeka konse m’dziko lapansi ndipo zimathera mu imfa. (2 Petro 1:4.) Koma kudzera mu imfa imene Yesu anabwera nayo, ife timafika mwa kumvera ku ulemerero umene njoka inamuyesa nawo Hava.
Pafupifupi aliyense amakhulupirira bodza lomwelo limene Hava anakhulupirira, ndipo pamapeto pake amawonongeka. Koma Yesu anafa ku zilakolako ndi zokhumba, ndipo anawononga mdierekezi amene anali ndi mphamvu ya imfa; ndipo kwa iwo amene amakhulupirira, mphamvu ya mdierekezi yawonongedwanso. Zimenezi zinatsimikiziridwa pamene Yesu anauka kwa akufa pa tsiku lachitatu. Paulo anakhulupirira zimenezi, ndipo chifukwa chodziwa Yesu, anatha kunena kuti, “Pakuti kwa ine, kukhala ndi moyo ndi Khristu ndipo kufa ndi phindu.” Afilipi 1:21-23
“Pakuti zimene Malamulo sanathe kudzichita, popeza anali ofowoka chifukwa cha khalidwe lathu la utchimo, Mulungu anazichita potumiza Mwana Wake m'chifanizo cha munthu ochimwa kuti akhale nsembe yauchimo. Ndipo Yesu anagonjetsa tchimo m'thupi la munthu.” Aroma 8:3. Iyi inali mbali yoyamba ya uthenga wabwino, ndipo inachititsa kuti mbali yachiwiri itheke.
Aroma 8:3 ndiye maziko a uthenga wabwino, ndipo zimene uthenga wabwino uli, timaŵerenga mu Aroma 8:4: “… chakuti chilungamo chofunikira cha lamulo chikwaniritsidwe kwathunthu mwa ife amene sitikhala monga mwachikhalidwe chathu cha uchimo koma mwa Mzimu.”