Mulungu anandipatsa moyo, koma chifukwa chiyani? Mulungu ayenera kuti anali ndi cholinga pondilenga!
Sindili ngati anthu ambiri a msinkhu wanga: kusiyana kwake n’kwakuti ndinalandira chisomo—ndipo ndimachionadi kuti ndi chisomo—chokhulupirira Yesu. Iye anandikhululukira machimo anga akale pamene ndinatembenukira kwa Mulungu, ndipo zimenezi zinandisangalatsa kwambiri. Koma moyo wanga ndi Khristu uyenera kukhala ndi zambiri kuposa kungokhululukidwa machimo. Mulungu ayenera kuti anali ndi cholinga pa moyo wanga pamene anandilenga!
Moyo wa Yesu
Ndikatsegula Baibulo langa, ndi mawu enieni a Yesu amene amalankhula ndi ine: “Tsono ndinati, ‘Ndili pano Ine, Inu Mulungu, ndabwera kudzachita mukufuna monga zinalembedwa m'Malemba," Ahebri 10:7. Inde, Yesu anachita chifuniro cha Mulungu pano padziko lapansi. Kenako ndinawerenga vesi 5: “…koma thupi munandikonzera.” Inenso ndili ndi thupi. Kodi Mulungu anakonzanso thupi langa kuti ndichite chifuniro chake? Kodi chifuniro chake n’chiyani? Kodi chimenechi chinalembedwanso momveka bwino m’Baibulo?
Ndinawerenga pa 1 Atesalonika 4:3 kuti: “Ndi chifuniro cha Mulungu kuti muyeretsedwe…” Chifuniro cha Mulungu ndicho kuyeretsedwa kwanga; Iye akufuna kuti ine ndikhale woyera. Ndipo vesi 7 limati: “Mulungu anatiitana kuti tikhale oyera ndipo safuna kuti tikhale mu uchimo.” Iye akufuna kuti ine ndikhale woyera. Woyeretsedwa, woyera … mawuwa ndi oyenera Yesu, koma amagwiranso ntchito kwa ine! Ndikudziwa kuti Mulungu alipo. Ndipo angandithandize kukhala ndi moyo wachiyero komanso woyeretsedwa, monga Yesu. Pano, munyengo zanga za tsiku ndi tsiku, ndingayeretsedwe, ndingakhale woyera!
Mulungu anandilenga ndi cholinga pa moyo wanga
Mulungu anandilenga kuti ndikhale ndi moyo womukondweretsa Iye, ndipo chimenecho ndicho cholinga cha moyo wanga pano! Ndipo akundipatsa mphamvu zonse ndi chitsogozo chimene ndikufunikira kuti ndichite zimenezi! “...alimbikitse moyo wanu wa m'kati ndi mphamvu za Mzimu wake…” Aefeso 3:16. Chifuniro Chake sichindilola konse kuti ndichimwe, ndipo amandipatsa thandizo ndi mphamvu kuti ndizikhala ndi moyo wopanda kuchimwa, monga mmene Yesu anakhalira.
Ndili wodzala ndi chimwemwe ndi chikhulupiriro mwa Mulungu, ndipo ngakhale Satana amandiyesa, ndikudziwa kuchokera m’Mawu a Mulungu kuti zimene Mulungu akuchita mwa ine zidzapambana. Ndikuona kuti kukhululukidwa kwa machimo anga kunali chiyambi chabe, ndipo ndikuyembekezera kuyenda ndi Mulungu tsiku lililonse—kuyenda koona ndi kokhulupirika kumene ndimatsatira mapazi ake: Iye sanachite tchimo…” 1 Petro 2:22.
Ndikupitiriza kukhala wosangalala kwambiri m’moyo uno wa kuyeretsedwa, ndipo ndikudziwa kuti chimwemwe changa chidzakhala nane kwamuyaya ndikadzamwalira.
Chimwemwe chimene ndalandira kale kuchokera ku moyo wodabwitsa umenewu chimandilimbikitsa kugawana nanu nkhani yanga. Mulungu wandilenga ndi cholinga, ndipo wakulengani ndi cholinga chomwecho. Iye ndi Mulungu wachikondi ndipo akuyembekezera kukuthandizani kukhala ndi moyo umene mudzagonjetse uchimo wonse! Kodi pali njira yabwinoko yogwiritsira ntchito thupi limene anakulengerani? Dziperekeni kwathunthu kwa Mulungu; werengani Mawu Ake monga momwe alembedwera ndipo yambani kuwatsatira! Ndikukutsimikizirani kuti moyo wanu udzakhala wodzaza ndi tanthauzo ndi cholinga!
Werengani zambiri: Palibe amene ayenera kuchimwa!