“Zidzachitidwira inu!”
Yesu anati, “Ine ndikudziwa kuti nthawi zonse mumayankha mapemphero anga.” Yohane 11:42 (CCL). Mawu awa akuwonetsa ubale umene unalipo pakati pa Yesu ndi Atate Ake, ndipo onse amene amapemphera amakhumba kuti akanatha kunena zomwezo. Nkhani yabwino ndi yoti sayenera kungokhumba; atha kukhaladi ndi ubale womwewo. M’buku la Yohane 15:7 (CCL) Yesu akuti: “Ngati mukhala mwa Ine, ndipo mawu anga akhala mwa inu, pemphani chilichonse chimene muchifuna, ndipo mudzapatsidwa.”
Izi zidalembedwa ndi cholinga choti tizikhulupirira; koma ngati tikayikira, sitikhala mwa Yesu, ndipo mawu Ake sakhala mwa ife, ndipo sitinganene kuti chilichonse chomwe tikufuna, chidzachitidwa kwa ife.
“Pamene Yesu anali pano pa dziko lapansi, anapereka mapemphero ndi mapembedzero, ndi kulira kwakukulu ndi misozi, kwa Iye amene akanatha kumupulumutsa ku imfa. Ndipo Mulungu anamva mapemphero ake chifukwa cha ulemu wake waukulu kwa Mulungu.” Ahebri 5:7 (CCL). M’masulidwe ena alembedwa kuti Mulungu anamva mapemphero a Yesu chifukwa cha kuopa kwake Mulungu.
M’nthawi yathu ino, Akhristu ambiri sakhulupirira zimenezi. Iwo samatha kuona njira yawo yamtsogolo, monga momwe Aisrayeli analili m’chipululu amene sanakhulupirire ndipo chifukwa chake sanalowe m’Dziko Lolonjezedwa. “Choncho tikuona kuti sanathe kulowa chifukwa cha kusakhulupirira.” Aheberi 3:19.
Chofunikira kuti pemphero liyankhidwe
Yesu anayenera kupemphera ndi mtima wonse, ndipo Atate Ake anamumva chifukwa cha kuopa kwake kwakukulu Mulungu. Pali chofunikira pa lonjezo lililonse. Kuti pemphero langa liyankhidwe, ndiyenera kuopa Mulungu, kutanthauza kuti ndimaopa kwambiri kuchimwa.
Kulira kwakukulu ndi kufuula sizimandipatsa zomwe ndikupempherera; koma kuopa kwanga Mulungu kumandipangitsa ine kulira chifukwa ndili pa chosowa changa kapena cha ena.
Mulungu adzayankha pemphero la aliyense mokondwera, koma amachita zinthu motsatira malamulo Ake, ndipo amaganizira za chipulumutso chathu ndi chiyeretso m’chilichonse chimene amachita. Tikaphunzira kudziwa malamulo a Mulungu, ndi kuchita zimene akunena m’malamulo Ake, zotsatira zake zimakhala mtendere pakati pa Mulungu ndi ife.