Pali mzere mu nyimbo ya ana umene wakhala thandizo lalikulu pa moyo wanga: “Kuwala kwa dzuwa, kuwala kwa dzuwa, Yesu akufuna kuti ndikhale kuwala kwa dzuwa …”
Nthawi iliyonse ndikamva kuti ndili mu nyengo yovuta, ndikuyesedwa kukwiya, kapena ndikukhala ndi “tsiku loipa,” mzere wa mu nyimboyi umandibwerera m’maganizo ndipo ndimakumbutsidwa kusintha maganizo anga ndi kusiya maganizo onse omvetsa chisoni. Ndiyenera kupemphera kuti ndilandire mphamvu yolimbana ndi mtima wodandaulawu. Sindingathe kungosintha mmene ndikumvera, koma ndi chisomo cha Mulungu, Iye angandithandize kugonjetsa tchimo limene limayambitsa kumva kudandaula ndi mtima umenewu, monga kudzikonda, kukwiya msanga, kuuma mtima, kapena chilichonse chimene chili.
Nkhope imene imawala
Koma kodi kukhala ngati kuwala kwa dzuwa kumatanthauza chiyani? Kwa ine, mawu akuti “kukhala ngati kuwala kwa dzuwa” amandichititsa kuganiza za nkhope imene imawala ndi chimwemwe ndi chikondi; nkhope imene imawala ndi kuwala. Munthu amene ali chonchi amakhala wabwino kukhala naye nthawi zonse, munthu amene nthawi zonse amachititsa zinthu kukhala zabwino kwa ena. Palibe amene ayenera kudera nkhawa kuti angakhumudwitse anthu amene ali choncho, kapena kuwapangitsa kukhala okwiya, kapena kunena chinthu cholakwika. Munthu wotere amakopa ena ndi mzimu wake. Umu ndi mmene ndikufuna kukhalira, tsiku ndi tsiku.
Koma ndingakhale bwanji ngati kuwala kwa dzuwa nthawi zonse? Nthawi zambiri zinthu zimachitika, nyengo zimabwera, ndipo mwadzidzidzi ndingakwiyire kapena kukhumudwitsidwa ndi ena. Kodi n’zothekadi kukhala kuwala kwenikweni kwa dzuwa nthawi zonse?
Kwa ine, kukhala kuwala kwa dzuwa kumatanthauza kuti kwenikweni ndine wokondwa, mosasamala kanthu za zimene kumverera kwanga kukufuna kundiuza. Mosasamala kanthu za maganizo oipa amene ndingayesedwe nawo, kapena kumverera kokwiya kumene ndikumva kuti kukubwera, ndingathe kunena kuti, “Ayi, sindikufuna kukhala choncho,” kenako kusankha kusonyeza chikondi, kukoma mtima, kuleza mtima, kufatsa, ndi zina zotero. Palibe amene ayenera kudziwa mayesero amene ndikukumana nawo amene angandiyese ku maganizo oipa; iwo ayenera kungoona kuti ubwino ndi kuwala zikutuluka mwa ine.
Ziribe kanthu zinthu zooneka ngati zoipa zotani zikandichitikira—kugwira ntchito ndi anthu ovuta, kudzipeza ndekha munyengo yovuta, ndi zina zotero—ziribe kanthu nkhondo imeneyi ikuchitika mobisika, koma zabwino zokhazokha ndi zimene zikutuluka.
Womasuka kukhala kuwala kwa dzuwa
Koma ndingakhale bwanji munthu wotereyu?
Nthawi zina mawu a nyimboyi amabwera nthawi yomweyo pamene maganizo anga ayamba kupita ku njira yamdima, koma nthawi zina ndimangozindikira maganizo amenewa patapita mphindi makumi awiri kapena kuposerapo. Koma ndikamafulumira kuchotsa maganizo amenewo ndikangowazindikira, pamenepo ndimakhala womvera zimene ndikudziwa kuti ndi zolondola.
Ngati ndilola maganizo omvetsa chisoniwa kukhala ndi kukhudza mzimu wanga, pamenepo amalowa mumtima mwanga, ndipo ndimayamba kukhala munthu womvetsa chisoni, wokwiya, ndi wosasangalala. Ndikalola maganizo osasangalatsawo kundilamulira, pamenepo ndimakhala kapolo wawo: kapolo wa machimo osayamika, kudandaula, kapena zinthu zina zoipa. (Yohane 8:34).
Koma ngati ndifulumira kuthana ndi maganizo auchimo amenewa nthawi yomweyo ndikangowazindikira, pamenepo machimowa “amaphedwa,” ndipo ndimakhala womasuka kukhala kuwala kwa dzuwa kwa Yesu! Moyo wa Khristu umaonekera mwa ine, ndipo ena angathe kuuona, ndipo Iye angalemekezedwe kudzera mwa ine. (2 Akorinto 4:10). Ndipo pamene ndikupitiriza kugonjetsa ndikayesedwa kumva kukwiya, zimakhala zosavuta kwambiri kuti ndisagonje, ndipo pamapeto pake zimakhala zochita zanga nthawi yomweyo.
“Inu ndinu kuwunika kwa dziko lapansi. Mzinda wa pa phiri sungathe kubisika. Anthu sayatsa nyale ndi kuyivindikira ndi mbiya, m’malo mwake, amayiyika poonekera ndipo imaunikira onse m'nyumbamo. Momwenso kuwunika kwanu kuwale pamaso pa anthu kuti aone ntchito zanu zabwino ndi kulemekeza Atate anu akumwamba.” Mateyu 5:14-16.
Ndikangoganiza za nyimboyi, “Kuwala kwa dzuwa, kuwala kwa dzuwa, Yesu akufuna kuti ndikhale kuwala kwa dzuwa …,” mtima wanga umakhala wopepuka ndipo zonse zimasintha. Ndimakumbukira kukhala wosangalala, ndimakumbukira kuyamika pa chilichonse, ndipo ndimakumbukira kukhala kuwala kwa ena. Sikuti ndiyenera kukhala wokhumudwa, ndipo ndithudi sindikufuna kukhala choncho. Kuyesedwa kukhala wokhumudwa ndi chinthu chachibadwa, koma palibe amene amakonda kumva kukhumudwa. Ndi chisankho. Ndipo tingasankhe kukhala osangalala. Tingasankhe kukhala kuwala kwa dzuwa.