Koma pali chinthu chimodzi chimene ndingathe kuchita—ndingathe kupemphera.
Ndipo kwenikweni chimenecho ndicho chinthu chabwino koposa chimene ndingachitire munthu. Chiyenera kukhala chinthu choyamba chimene chimabwera m’maganizo mwanga ndikawona chosowa, osati chinthu chomaliza chimene ndimaganizira pamene sindikudziwa china chimene ndingachite. Ndikhoza kunyamulira ena m’pemphero! Yakobo analemba pa Yakobo 5:16 kuti “pemphero la munthu wolungama ndi lamphamvu ndipo limagwira ntchito.” Sikuti limangogwira ntchito pang’ono chabe, kapena kukhala lothandiza pang’ono chabe. Ndi lamphamvu ndipo limagwira ntchito.
Sindiona nthawi zonse zotsatira za mapemphero anga, koma ndingakhale wotsimikiza kuti ndi othandiza. Izi sizikutanthauza kuti mavuto amene munthu akukumana nawo adzachotsedwa. Mwina Mulungu akumulola kuti adutse m’mayesero amenewa ndi cholinga choti ayeretsedwe. (1 Petro 1:6-9.) Koma mapemphero anga angamupatse mphamvu zowonjezereka ndi kumulimbikitsa kuti athe kupirira mayeserowo. Ngakhale ngati alibe chikhulupiriro kapena mphamvu mwa iye yekha, mwina ndingamuthandize kunyamula katundu wake!
Nkhondo m’dziko la mizimu
Mzimu Woyera akandikumbutsa za munthu wina, ndiye kuti ndiyenera kuyamba utumiki uwu wa pemphero. Ndi nkhondo imene ndiyenera kumenya! Timawerenga pa Aefeso 6:18, “Ndipo mupemphere mwa Mzimu nthawi zonse, m'mitundu yonse ya mapemphero ndi zopempha. Ndipo pozindikira izi, khalani achangu kupempherera oyera mtima nthawi zonse.”
Ndipo mu Aefeso 6:12 akuti, “Pakuti sitikulimbana ndi thupi ndi magazi, koma tikulimbana ndi maufumu, maulamuliro, mphamvu zoyipa za dziko la mdima, ndi mphamvu zoyipa kwambiri zauzimu zamlengalenga.” Ndiyenera kutenga nawo mbali polimbana ndi olamulira amdima amenewa m’dziko lauzimu, komanso ndi zoyesayesa za Satana zofuna kuchititsa anthu kukayikira kapena kutaya mtima.
Nthawi zonse ndimakonda nkhani inayake yokhudza Danieli. Mngelo anabwera kwa iye n’kumuuza kuti mawu ake—mapemphero ake—anamveka, komanso kuti mngeloyo anali kuyesetsa kufika kwa Danieli. Koma “kalonga wa ufumu wa Perisiya”—amene ndikumvetsa kuti anali mphamvu yauzimu—anamuletsa kwa masiku 21. Iwo anamenyana m’dziko la mizimu mpaka mngelo wamkulu Mikayeli anabwera kudzathandiza, ndipo kalonga wa ufumu wa Perisiya anagonjetsedwa (Danieli 10:10-14).
Nkhaniyi yanditsegula maso pang’ono pa zimene zikuchitika m’dziko la mizimu. Kumeneko kuli nkhondo, ndipo ndikukhulupirira kuti pemphero ndi lofunika kwambiri poletsa mphamvu za mizimu yoipa kuti zisayandikire. Mwina mapemphero anga angalimbikitse mbali ya zabwino! Ndingachitenso zimenezi kwa anthu amene alibe chikhulupiriro chawochawo. Ndingathe kumenyera nkhondo m’malo mwawo mpaka atakhala ndi chikhulupiriro.
Kukwaniritsa lamulo la Khristu
Izi ndi zimene zimatanthauza kunyamulirana zothodwetsa za wina ndi mnzake. Ndithudi, Mulungu angandiwonetsenso zinthu zimene ndingachitiredi anthu, njira zimene ndingawathandizire, ndipo pamenepo n’kofunikanso kukhala womvera pa zimene Mulungu akuchita. Koma kupemphera ndi chinthu choyamba komanso chachikulu kwambiri chimene ndingachitire munthu. Ndipo kumalimbitsa maubwenzi achikondi. Yesu anatilangiza kuti, “Kondanani wina ndi mnzake, monga momwe Ine ndinakonda inu.” Yohane 13:34.
Ananenanso kuti, “… chilichonse chimene munachitira mmodzi wa abale anga onyozekawa munandichitira Ine.” Mateyu 25:34-40. Moyo umenewu wa pemphero ndi chisonyezero cha chikondi kwa anthu, komanso kwa Yesu Mwiniwake. Ndipo limenelo ndilo gawo lachiwiri la Agalatiya 6:2: “… ndipo mukatero mudzakwaniritsa lamulo la Khristu.”
Ine pandekha, ndikadali ndi njira yayitali yoti ndiyende, koma ndikufunadi kulowa mowonjezereka m’moyo umene ndingathe kunyamula zothodwetsa. Ndi ntchito yobisika, utumiki wobisika, koma ungabale zipatso zambiri kwambiri.