Yesu anabwera kudzabweretsa kusintha; Iye anabwera kudzagwetsa mphamvu zoipa padziko lapansi pano. Kodi mukudziwa mmene mungakhalire mbali ya ntchito yaikuluyi?
Dziko lonse lili pansi pa mphamvu yoipa ya uchimo. Ndi muzu wa vuto lililonse, misozi yonse ndi kuvutika kulikonse padziko lapansi. Kulikonse kumene mungayang'ane, nsautso yonse, kusoŵa, ndi chisalungamo zili ndi muzu wake m'uchimo. Dziko laipitsidwa, ndipo m'kupita kwa nthaŵi, ziphuphu ndi zoipa zimaipiraipira. Zinthu zonsezi zinaloseredwa ndi Yesu (onani Mateyu 24), koma kodi cholinga Chake ndi chiyani ndi zonse?
Kuwononga muzu wa vuto
Yesu Khristu Mwini anabwera ndi yankho. Iye anali chiyambi cha kusintha, pafupifupi zaka 2000 zapitazo. M'masiku Ake padziko lapansi, umbombo, upandu, ziphuphu ndi chisoni zinalinso zofala. Israyeli anali kuvutika mu ulamuliro waukulu wa Ufumu wa Roma. Iwo anali kuyembekezera mpulumutsi - wina kuti abwere kudzagwetsa ulamuliro woipa wa Roma ndikuwamasula.
Sizinali zosiyana kwambiri ndi momwe zilili tsopano. Ambiri amaganiza kuti zingakhale bwino ngati ngwazi yamphamvu ikhoza kudzuka ndi kugwetsa mabizinesi akuluakulu onse aumbombo, maboma achinyengo, magulu a zigaŵenga, ndi zoipa zina zomwe zili zofala kwambiri m'tsiku lathu. Koma Yesu sanabwere kudzachiritsa zizindikiro za uchimo. Iye sanabwere kudzagwetsa olamulira oipa a dzikoli. Anabwera kudzaukira muzu wa vutolo. Anabwera kudzagonjetsa uchimo weniweniwo (1 Yohane 3:8).
Ndipo zimenezo n'zimene Iye anachita. Yesu anagonjetsa kotheratu uchimo wonse m'moyo Wake. Mwa kuchita zimenezi, Iye anagonjetsa wolamulira woipa Satana, ndipo anasonyeza dziko kamodzi kokha kuti mtundu wa anthu sufunikira kukhala kapolo wa Satana, kuti sitifunikira kumumvetsera.
"Kusintha" kumeneku kunayamba mwakachetechete pa nthawi ya moyo wa Yesu ali wamng'ono. Yesu anagonjetsa Satana mwa kudzichepetsa Pansi pa chifuniro cha Atate ndipo nthawi zonse ankanena kuti "kayi" ku uchimo. Iye sanagonje ku uchimo ndi Satana. Ngakhale pamene Iye anali kufa pa mtanda mu ululu waukulu, Iye sanachimwe. Iye anatsimikizira dziko kuti Satana analibenso mphamvu zonse.
Kugwetsa wolamulira woipa
Nkhondo yathu si yolimbana ndi olamulira aumunthu, andale ndi ochimwa a nthawi ino. Iwo ndi chizindikiro chabe cha vuto lalikulu (Aefeso 6:12). Muzu wa vutolo ndiwo uchimo weniweniwo. Ndicho cholinga cha ntchito ya Yesu - kusintha Iye anabwera kudzabweretsa. Amafuna kuwonongeratu uchimo. Ameneyo ndi mdani amene timalimbana naye.
Amene amatsatira Yesu, ophunzira Ake, akulimbana ndi "mdani" ameneyu mwa kusagonja ku tchimo limene iwo eniwo akuyesedwa (Akolose 3:5). Amatenga mtanda wawo tsiku lililonse, osagonja ku chifuniro chawo chochimwa, ndipo mwanjira imeneyi amatsatira Yesu (Luka 9:23).
Ophunzira ndi odzichepetsa ndipo amavomereza pamene ali olakwa. Amasankha kudalitsa pamene akuchitiridwa mopanda chilungamo. Amasankha kupereka pamene iwo eniwo akusowa. Pamene umbombo, mkwiyo, nkhaŵa, kunyada, nsanje, chidetso, ndi machimo ena onse ayesa kuloŵa m'mitima yawo, ophunzira amawakana. Amakana kugwirizana ndi malingaliro ochimwa amenewo. Amasankha kulimbana nawo! Amasankha kubweretsa kusintha kwathunthu!
Yesu ali pampando wachifumu
Cholinga cha otsatira a Yesu ndi kuika Yesu pampando wachifumu padziko lapansi. Pamene Satana, wolamulira wa dziko lino, wagonjetsedwa pa nkhondo pambuyo pa nkhondo - pamene otsatira a Yesu awonongeratu mphamvu ya Satana m'dera lililonse la moyo wawo - ndiye kuti Mulungu adzasankha kuti, "Tsopano zakwanira." Pamenepo ulamuliro wa Satana udzakhala kumapeto ndipo Mulungu adzaika Yesu kuyang'anira dziko lapansi (Chivumbulutso 19:11).
Ichi ndi Kubwera Kwachiwiri kwa Khristu ndi chiyambi cha Zaka Chikwi, zaka chikwi za mtendere ndi chisangalalo padziko lapansi. Pokhala ndi Yesu pampando wachifumu ndi atumiki a mdierekezi atathamangitsidwa, mtendere ndi chilungamo zidzatha kufalikira padziko lapansi. Ziphuphu za uchimo zidzachepa kwambiri ndipo machiritso adzayamba. Pamenepo idzakhala nthawi yoyamba kuyeretsa zizindikiro za uchimo, chifukwa ophunzira a Yesu akanagonjetsa kale muzu wa uchimo mkati mwa iwo okha.
Pamenepo anthu amene anasankha kutumikira Yesu adzakwera kwa olamulira onse oipa, andale achinyengo ndi amalonda aumbombo amene amapondereza ndi kuchitira nkhanza anthu, ndipo adzawagwetsa! Iwo adzakhala ndi mphamvu ndi ulamuliro wa kuchita zimenezo, chifukwa chakuti agonjetsa kale wolamulira wamkulu wa uchimo (Satana) mwa iwo eni.
Mwinamwake mukudabwa kuti ululu wonse ndi chisoni m'dziko zidzawongolera motani. Zimenezi zidzachitikanso Yesu akadzabweranso. Pamenepo zonse zidzakhala bwino. Palibe amene adzayenera kupempha ndalama kapena chakudya ndipo sipadzakhalanso kumenyana ndi kukangana. Chilungamo chidzalamulira, ndipo sipadzakhalanso mtundu uliwonse wa kupondereza! Sipadzakhalanso misozi ndipo sipadzakhalanso kuvutika.
Kodi mudzakhala pamodzi m'kugwetsa wolamulira wa uchimo, choyamba m'moyo wanu, ndiyeno padziko lonse lapansi?