Anthu ambiri amafuna kuona ubwino wa Mulungu m’miyoyo yawo. Mulungu ndi wabwino; amawalitsira dzuwa lake pa oipa ndi pa abwino, ndipo amagwetsa mvula pa olungama ndi pa osalungama (Mateyu 5:45). Chikondi cha Mulungu chimaphatikizapo anthu onse. Iye “Ndipo Mulungu anatiukitsa pamodzi ndi Khristu ndi kutikhazika pamodzi ndi Iye m’mwamba mwa Khristu Yesu, ndi cholinga chakuti nthawi imene ikubwera, Iyeyo adzaonetse chuma choposa cha chisomo chake, choonetsedwa mwa kukoma mtima kwake kwa ife mwa Khristu Yesu.” Aefeso 2:6-7.
Koma si anthu onse amene amamva chikondi cha Mulungu kapena kuona ubwino Wake. Zingaoneke ngati Mulungu ali ndi anthu amene amawakonda kwambiri, koma Iye sakondera ena kuposa ena. Zimene anthu amakumana nazo zimasiyana chifukwa cha mmene amalandirira chikondi ndi ubwino Wake m’mitima mwawo.
Tingafunse kuti, “Kodi Mulungu amasunga kuti ubwino wonsewu?” Timawerenga pa Aefeso 2:10, “Pakuti ndife ntchito ya Mulungu, olengedwa mwa Khristu Yesu kuti tichite ntchito zabwino, zimene Mulungu anazikonzeratu kale kuti tizichite.”
Ubwino wa Mulungu udzanditsata
Chinsinsi chake ndi kubwera kwa Khristu ndi kukhala munthu watsopano mwa Iye (2 Akorinto 5:17). Mulungu wasunga ubwino wake mwa Khristu—ndipo ndidzazindikira ubwino waukulu umene Mulungu amandichitira, ngati ndiyenda m’ntchito zimene Mulungu wandikonzera ndi kumutumikira mokhulupirika komanso mwachikondi. Wabisa ubwino wake m’ntchito ndi m’zochitika zimene wandikonzera m’moyo.
Kenako ndidzadziwonera ndekha zimene Davide akunena mu Masalimo 23:6: “Ndithudi, ubwino ndi chifundo zidzanditsata masiku onse a moyo wanga, ndipo ndidzakhala m’nyumba ya Yehova kwamuyaya.” Ubwino wa Mulungu udzanditsata!
Pitirizani mu ubwino wa Mulungu
Tinganene kuti mmene mumamuonera Mulungu zimasonyeza mmene mtima wanu ulili. “Kwa wokhulupirika, Inu mumaonetsa kukhulupirika kwanu; kwa anthu a makhalidwe abwino, Inu mumaonetsanso makhalidwe abwino, kwa oyera mtima, Inu mumaonetsa kuyera mtima kwanu, koma kwa achinyengo mumaonetsanso kunyansidwa nawo.” Masalimo 18:25-26. Ngati ndinu ouma khosi komanso opanda chifundo, mudzaona Mulungu ngati wouma khosi komanso wankhanza.
Ngati mukufuna kudziwa Mulungu ngati Mulungu womasuka, wachikondi ndi wachifundo, khalani omasuka, achikondi ndi achifundo kwa ena. Uthenga wabwino uli ndi mphamvu zokwanira zosinthira munthu kuchoka pa chikhalidwe choipa n’kukhala woona mtima, woyera ndi wolungama.
Pakuti, “Iye amene angakonde moyo ndi kuona masiku abwino, aletse lilime lake kuyankhula zoipa, ndiponso milomo yake kunena mabodza. Apewe zoipa, ndipo azichita zabwino. afunefune mtendere ndi kuyesetsa kuwupeza. Pakuti Ambuye amayang’anira bwino anthu olungama ndipo amatchera khutu ku mapemphero awo....” 1 Petro 3:10-12. “...kukoma mtima kwa inu, malinga ngati musamala kukoma mtima ...…” Aroma 11:22. Mumapitiriza kukhala mu ubwino wake ngati mumvera Mulungu mokhulupirika pamene akugwira ntchito mwa inu kuti muchite zabwino m’moyo wanu.
Ubwino wa Mulungu monga mphamvu yoyendetsera
Mulungu sakakamiza aliyense kuchita zinthu motsutsana ndi chifuniro chake. “Kodi kapena ukupeputsa kukoma mtima kwa Mulungu , kuleza mtima kwake ndi kupirira kwake? Kodi suzindikira kuti kukoma mtima kwakeko, n'kofuna kuti iweyo ulape machimo ako?” Aroma 2:4. Mu ubwino wake waukulu ndi kuleza mtima kwake, Mulungu amatikoka ndi kutitana kuti titsatire njira yake, kuti atitsanulire ubwino wake wochuluka motsatira malamulo ake. Kodi ukufuna kukhala mmodzi mwa anthu amenewa?