Chenjezo lochokera kwa Mulungu
Mulungu anaika pempho lamphamvu m’mitima ya aneneri, lolimbikitsa Israeli kudzuka ndi kutumikira Mulungu wamoyo m’malo mwa mafano a matabwa ndi miyala. Limeneli linali pempho la chikondi lochokera kwa Mulungu, amene ankafuna kuti anthu Ake osankhidwa akhale Ake yekha. Koma iwo sanafune kumvetsera ndipo sanakhulupirire. Mulungu ankafuna kupereka zambiri osati kungowakhululukira; ankafunanso kukhala pa ubwenzi ndi Israeli, kuti amuwope, azimukonda ndi kusunga malamulo Ake. Ndipo Iye akufuna ubwenzi womwewo ndi ife lero!
Aneneri onyenga nthawi zonse akhala akupangitsa anthu kudziona ngati ali otetezeka, ponena kuti, “Pali mtendere, mtendere,” pamene panali ngozi. Motero anapatutsa anthu kwa Mulungu, kuti azikhala ndi chikumbumtima chosawatsutsa pa zoipa zawo!
Lero, kuposa kale lonse, tikuitanidwa kukhala maso ndi okonzeka. Mtengo wa mkuyu ubala zipatso posachedwa, ndipo Yesu akunena kuti tikaona masamba akutuluka, tiyenera kukweza mitu yathu ndi kuyembekezera chiwombolo chathu, pamene Mulungu adzatimasula. Pachifukwa chimenechi Iye akuti, “Khalani tcheru nthawi zonse ndi kupemphera kuti inu mudzathe kuthawa zonse zimene zili pafupi kuchitika, ndi kuti mudzathe kuyima pamaso pa Mwana wa Munthu." Luka 21:25–36.
Khalani maso ndipo khalani okonzeka pamene Khristu adzabweranso
Chikondi cha Mulungu chimatidzutsa, pamene mawu ena onse amatinyenga. Mafanizo onse a Yesu ndi Mawu ake onse amatiitana kuti tikhale maso ndi okonzeka. *“Akazi awiri adzakhala akusinja pa mtondo; wina adzatengedwa ndi wina adzasiyidwa. Chifukwa chake yang'anirani, popeza simudziwa tsiku lanji limene Ambuye anu adzabwera. Koma zindikirani ichi: Ngati mwini nyumba akanadziwa nthawi yanji ya usiku imene mbala imabwera, sakanagona ndipo sakanalola kuti nyumba yake ithyoledwe. Inunso tsono muyenera kukhala okonzeka, chifukwa mwana wa munthu adzabwera pa nthawi imene inu simukuyembekezera. ”* Mateyu 24:41–44
Thupi lathu liyenera kukhala nyumba ya Ambuye imene Mzimu Woyera amakhala ndi kulamuliramo. Tiyenera kukhala tcheru kuti mizimu ina isalowe ndi kutenga mphamvu. Yesu akunena mu Yohane 12:31 kuti, “Ino tsopano ndi nthawi ya chiweruzo pa dziko lapansi; tsopano olamulira wa dziko lapansi adzathamangitsidwa.” Inde, adzathamangitsidwa ndi Mzimu wa changu, ndipo sadzalowanso, chifukwa ufumu wakumwamba ndi Mzimu wake zalowa m’mitima mwathu.
Mzimu wa dziko lapansi ndi zinthu za dziko lino zachotsedwa. Tikakhala motere, tingakhale tcheru ndi kukhala okonzeka Khristu akadzabweranso. Sitiyenera kukhala kapena kuvala m’njira yoti tichotsedwe mu ufumu wa Mulungu limodzi ndi kalonga wa dziko lino.
Pokhapokha Mzimu wa Khristu akakhala mwa ife, tingakhale ndi chiyembekezo chokwatulidwa Khristu akadzabweranso (Aroma 8:11).
Nthawi ndi yochepa
Masiku ano, kuposa kale lonse, anthu akuphunzitsidwa zimene zimawapatsa chitsimikizo chabodza chakuti aliyense amene amakhulupirira nsembe ya Khristu adzakhala mbali ya mkwatibwi wa Yesu akadzabweranso.
Anamwali asanu opusa nawonso anakhulupirira nsembe ya Khristu. Anatuluka kukakumana ndi Mkwati atanyamula nyali zawo. Atazindikira kuti analibe mafuta okwanira, anapita kukagula ena, koma anachedwa. “Koma pamene ankapita kukagula mafutawo, mkwati anafika. Anamwali amene anali okonzeka aja analowa naye pamodzi m’nyumba ya phwando la ukwati, ndipo khomo linatsekedwa. Pambuyo pake enawo anabwera nati, ‘Ambuye, Ambuye, titsekulireni!’ Koma iye anayankha kuti, ‘Zoonadi, ndikukuuzani kuti sindikukudziwani.’ Choncho khalani odikira, popeza simudziwa tsiku kapena nthawi.” Mateyu 25:10–13.
Anthu a m’mipingo isanu ndi iwiri yotchulidwa m’buku la Chivumbulutso nawonso anakhulupirira, koma ntchito zawo sizinali zangwiro kapena zabwino. Kudzera mu ntchito zathu, Yesu amaona kuti chikondi chili champhamvu motani m’mitima mwathu, ndipo ku Efeso anaona kuchokera pa ntchito zawo kuti anasiya chikondi chawo choyamba.
Mu Chivumbulutso 10:5–7 timawerenga za mngelo wachisanu ndi chiwiri amene anaima panyanja ndi pamtunda, amene anakweza dzanja lake lamanja kumwamba ndi kulumbira kuti sipadzakhalanso kuchedwa. Pamenepo chinsinsi cha Mulungu chidzakwaniritsidwa, monga anauzira atumiki ake, aneneri. Nthawi yotsalayo ndi yochepa, ndipo nthawi ndiyo moyo wathu.
Maulosi okhudza Israeli anakwaniritsidwa
Kwa anamwali asanu opusa panalibenso nthawi yoti akhale m’gulu la mkwatibwi. M’zaka zingapo zapitazi, zachitika zinthu zambiri zofunika zimene aneneri analankhula za izo kalekale. Chinthu chofunika kwambiri kuposa zonse n’chakuti Israeli wabwerera kudziko lake, ndipo Yerusalemu sakulamulidwanso ndi anthu amitundu ina. Yesu akunena kuti tikaona zizindikiro zoterezi, tiyenera kudziwa kuti kubwera kwake kwayandikira, monga mmene chilimwe chimayandikira mtengo ukayamba kuphukira. Pa Ezekieli 28:23–26 tingaone mmene Ambuye adzaweruzire mitundu yozungulira Israeli, pamene Israeli adzakhala motetezeka.
Mulungu amatsogolera Israeli wa padziko lapansi komanso Israeli wauzimu kudzera m’mavuto ndi masautso kupita ku ulemerero. Mu Yesaya 41 timawerenga mmene Mulungu amatonthozera Israeli m’mavuto awo ndipo amawauza mobwerezabwereza kuti asaope chilichonse, chifukwa Iye mwini adzawathandiza. Onse amene amenyana ndi Israeli adzalephera. Mu Yesaya 54:17 timawerenga kuti palibe chida chopangidwa kuti chiwatsutse chimene chidzapambana. Ifenso taonapo zimenezi.
Taona maulosi ambiri akukwaniritsidwa- okwanira kutithandiza ife kuti tikhale atcheru ndi okonzeka.“Tiyeni tisangalale ndi kukondwera, ndi kumutamanda! Pakuti nthawi ya ukwati wa Mwana wa Nkhosa yafika, ndipo Mkwatibwi wakonzekeratu.. Wapatsidwa nsalu yoyera kwambiri, yowala ndi yosada kuti avale (Nsalu yoyera kwambiri ikuimirira ntchito zolungama za oyera mtima).” Chivumbulutso 19:7–8.
Tikhale ndi moyo m’njira yoti nthawi zonse tikhale okonzeka, ndipo tiziyembekezera mokondwera kukumana ndi Mkwati wathu wakumwamba. Adzabwera kudzatenga anthu amene akumuyembekezera. Sitikuyembekezera nkhondo ndi Wotsutsakhristu, koma phwando laukwati kumwamba ndi chilimwe chosatha!