Kuwerengedwa ngati chilungamo chifukwa cha chikhulupiriro
Anthu ambiri amene amalankhula za chilungamo chimene chimawerengedwa kwa ife amaganiza za ochimwa amene amakhulupirira mu chiombolo, kotero kuti moyo wa Yesu—chilungamo Chake—zimawerengedwa ngati chilungamo chawo, ngakhale kuti sichikuwayenera. Palibe anthu ambiri amene amaganiza kuti chilungamo cha Yesu chiyenera kukhala moyo wawo waumwini; anthu ambiri amaganiza kuti ndi chinthu chimene chimangowerengedwa kwa iwo.
Sizinali choncho kwa Abrahamu. “Abramu anakhulupirira Yehova, ndipo ichi chinamuchititsa kukhala wolungama.” Genesis 15:6. Mulungu anamulonjeza mwana wamwamuna. Abrahamu akanachita kusalungama kwakukulu akanapanda kukhulupirira—akanapangitsa Mulungu kukhala wabodza. Koma Abrahamu anapereka ulemerero kwa Mulungu ndipo anakhulupirira kuti Mulungu adzachita zimene analonjeza. Mfundo yakuti anakhulupirira zimenezo, chimenecho chinawerengedwa kwa iye ngati chilungamo. M’mawu ena, anali wolungama chifukwa anakhulupirira lonjezolo. Anakhulupirira kuti Mulungu adzamupatsa mwana wamwamuna. Ngakhale kuti anali wokalamba ndipo chiberekero cha Sara chinali chakufa, sanakayikire, koma analimba m’chikhulupiriro pamene ankapereka ulemerero kwa Mulungu (Aroma 4:19-24). Mfundo yakuti Abrahamu anapereka ulemerero wonse kwa Mulungu inatsimikizira chilungamo chake.
Malonjezo
Izi zinalembedwa chifukwa cha ife. Ndani amakhulupirira kuti Mulungu ndi wokhulupirika ndipo adzasunga malonjezo Ake? Mulungu watipatsanso ife, anthu ochimwa, malonjezo aakulu. “Mwa ulemerero ndi ubwino wakewo, anatipatsa malonjezo opambana kwambiri ndi a mtengowapatali. Amenewa ndi malonjezo amene amakuthandizani kulandira nawo moyo wa Mulungu....” 2 Petro 1:3–4. Munthu amene amakhulupirira kuti izi zidzamuchitikira amakhulupirira kuti Mulungu ndi woona ndi wokhulupirika, ndipo zimenezo zidzawerengedwa kwa iye ngati chilungamo.
“Kale inu ... koma tsopano Iye anakuyanjanitsani m’thupi la Khristu kudzera mu imfa yake kuti akuperekeni pamaso pake oyera, opanda banga ndi opanda chotsutsidwa nacho.” Akolose 1:21-22
Awa ndi malonjezo aulemerero, koma ndani amawakhulupirira kotero kuti chidzawerengedwa kwa iye ngati chilungamo? Okhulupirira ambiri ataya chikhulupiriro chakuti Mulungu ndi wokhulupirika ndi woona. Sakhulupirira kuti Iye adzachita izi mwa iwo, ndi kuti Iye ndi wamphamvu kuzichita ngakhale iwo ali ochimwa aakulu. Ayi, sakhulupirira kuti Mulungu angathe kuzichita, kuti Iye ndi wamphamvu kuchita ntchito yotereyi mwa iwo.
Choncho amakhulupirira kuti Iye adzangowerengera chilungamo cha Yesu kwa iwo popanda malonjezo aliwonse kukwaniritsidwa m’miyoyo yawo. Amaganiza kuti ziyenera kuonedwa ngati kuti zili choncho. Kodi zimenezo zikupereka ulemerero kwa Mulungu? Kodi ndi chilungamo kukhulupirira kuti Mulungu amachitira malonjezo Ake motero? Kodi mukukhulupirira kuti chikhulupiriro chimenechi chidzawerengedwa kwa inu ngati chilungamo? Anthu zikwizikwi amakhala mu chisomo chabodza chimenechi chimene Yuda analemba mu Yuda 4, ndipo Mulungu sangakwaniritse malonjezo Ake m’miyoyo yawo.
Chilungamo—osati kungowerengedwa kokha, koma chenicheni
“Koma ngati ife tiyembekezera chimene tikanalibe, ndiye kuti tikuyembekeza modekha mtima.” Aroma 8:25.
Munthu amene sachiyembekezera mwachidwi nayenso sakhulupirira. Abrahamu anakhulupirira, ndipo anayembekezera mwachidwi kuti Isaki abadwe—kukwaniritsidwa kwa lonjezo. Analandira chimene anakhulupirira—analandira Isaki. Abrahamu anasiya mapazi a chikhulupiriro (Aroma 4:12)! Anamvera pamene Mulungu anamuitana (Ahebri 11:8).
Ndife ana a Abrahamu ngati tikhala omvera chikhulupiriro. Pamenepo timalandira zimene Mulungu walonjeza Agalatiya 3:7 — timagawana nawo chikhalidwe chaumulungu. Timachiyembekezera mwachidwi ndipo timathawa chivundi chimene chili m’dziko chifukwa cha chilakolako cha uchimo. Timachita zonse popanda kudandaula ndi kukayikira kuti tikhale opanda chilema ndi osalakwa, “… ana a Mulungu opanda cholakwika mu m'bado uno wachinyengo ndi osocheretsa. Mukatero mudzawala pakati pawo ngati nyenyezi zakumwamba.” Afilipi 2:14–15.
Apa tikuona bwino lomwe kuti lonjezoli si chinthu chimene timangonamizira kuti ndi choona, chimene chidzangowerengedwa kwa ife. Liyenera kukwaniritsidwa m’miyoyo yathu m’dziko lino. Ndipo ngati tikhulupirira Iye amene ali wokhoza kuchita koposa kwambiri zonse zimene timapempha kapena kuganiza, monga mwa mphamvu imene imagwira ntchito mwa ife, zimenezo zidzawerengedwa kwa ife ngati chilungamo (Aefeso 3:20).