Johan Oscar Smith anali munthu woopa Mulungu, wokhala ndi nzeru zambiri komanso womvetsa bwino Mawu a Mulungu. Titha kuona pang’ono za nzeru imeneyi powerenga mawu ake ena pansipa. Mawu achidule amenewa, otengedwa m’mabuku ake, m’mauthenga ake ndi m’kukambirana kwake kwa tsiku ndi tsiku, amasonyeza osati moyo wauzimu wozama mwa Khristu wokha, komanso kudzichepetsa kwakukulu ndi umphawi wa mumtima.
Chowonadi
“Popeza choonadi chilichonse chili ndi mphamvu yotimasula, amene amayenda m’choonadi m’njira zake zonse adzamasulidwa. Ngakhale bodza “laling’ono” limapatsa mphamvu za mdima mpata woti zitiukire, koma choonadi chimazithamangitsira kutali.”
Chilungamo
“Anthu ochepa okha ndi amene amadziwa kuti chilungamo n’chiyani. N’chilungamo kuvutika ndi zotsatira za kupusa kwako. Ukachimwa, n’chilungamo kupirira zotsatira za tchimo lako popanda kudandaula. Kukhala woona mtima ndi kunena zimene zili mumtima mwako pochita zinthu ndi anthu ena nachonso n’chilungamo. Amene ali ndi njala ndi ludzu la chilungamo adzakhuta (Mateyu 5:6)—ndipo kudzazidwa ndi chilungamo n’kwabwino kwambiri.”
Pa mtanda ndi pansi pa mtanda
“Iwo amene ali a Khristu anapachika thupi lawo pamodzi ndi zilakolako zake zauchimo ndi zokhumba zake (Agalatiya 5:24), koma simungachite zimenezo pansi pa mtanda. Anthu amene anapachika Yesu nawonso anaima pansi pa mtanda. Kungoima pamenepo sikumapweteka thupi; koma mukapachikidwa pamodzi ndi Yesu, mudzagawana naye masautso Ake (Afilipi 3:10).”
Mverani ndipo chitani
“Yakobo akunena kuti mumadzinyenga nokha ngati mumangomva Mawu a Mulungu koma osawachita. Anthu ambiri amakhala chonchi moyo wawo wonse—akumva Mawu a Mulungu mobwerezabwereza, koma osayesanso kuchita zimene amva!”
Chitani ntchito zake
“Mulungu amabzala Mzimu Wake ndi changu m’mitima mwathu kuti agwire ntchito mwa ife. Ntchito ikamalizidwa, pamatsala mpumulo wodekha. Sitifunika kukankhira ena pambali, chifukwa Mulungu anakonza ntchito zathu m’njira yoti tisamasokonezane. Tiyenera kungoonetsetsa kuti tikuchita ntchito Zake.”
Ufulu wabodza
“Ufulu wabodza ndi chifukwa chinanso chimene anthu amapangira ziphunzitso zonena kuti sitiyenera kuvutika. Chiphunzitso china chotere chimanena kuti Yesu wachita zonse, choncho sitiyenera kulimbana ndi chikhalidwe chathu chauchimo kapena chifuniro chathu chodzikonda. Timaonanso ufulu wabodzawu anthu akamanyoza anthu amene amayesetsa kukhala moyo woopa Mulungu, n’kunena kuti anthu amenewa amakhala mu ukapolo.”
Chilango chosatha
“Ichi ndi chilango chosatha: zinthu zapadziko lapansi zimene tinkazikonda zimatha, pamene moyo wathu wosatha umadzazidwa ndi kupanda kanthu kokha m’malo modzazidwa ndi Mulungu Mwiniwake. N’chifukwa chake n’kofunika kwambiri kutembenuzira maganizo athu mkati mwathu, ku gwero la moyo limene limakhala kosatha, monga mmene ifenso tidzakhalire ndi moyo kosatha.”
Nkhondo yamkati
“Tili ndi moyo wathu wamkati komanso adani amkati oti tilimbane nawo, kuwagonjetsa ndi kuwaononga. Adani amenewa ndi zilakolako zimene zimayesa kutisokoneza mwa kuchititsa maganizo athu kuyang’ana pa zinthu zakunja, zinthu zimene zidzatha.”
Nkhondo ya chikhulupiriro
“Palibe amene angachoke mumdima n’kupita ku kuunika, kapena kuchoka pansi pa mphamvu ya Satana n’kupita kwa Mulungu, popanda nkhondo yaikulu komanso kulimbana kwabwino kwa chikhulupiriro. Sitingapeze kuunika kokwanira tsiku limodzi. Tiyenera kukhala okhulupirika kwambiri kuti Mulungu atipatse kuunika kowonjezereka.”
Kuleza mtima
“Munthu woleza mtima amapirira pamene ena ataya mtima. Nthawi zonse amaganizira za mmene Mulungu wakhala akumulezera mtima, ndipo amaona kuleza mtima kwa Mulungu kukhala chipulumutso (2 Petro 3:15). Kuleza mtima kumapirira pamene palibe wina aliyense angapirire, ndipo nthawi zonse kumayembekezera kuti pamapeto pake zinthu zidzayenda bwino.”
Gwiritsani ntchito nthawi yanu
“Anthu akanatha kuchita zambiri ngati akanayesetsa kwambiri. Muyenera kukhala ndi udindo pa moyo wanu. Samalani mmene mumagwiritsira ntchito nthawi yanu komanso zimene mumamvetsera! Samalani mmene mumayendetsera zochitika zanu zonse, kuti Mulungu akondwere nanu. Funafunani ulemu wa Mulungu pa chilichonse chimene mumachita.”
Kukhulupirika m’kuunika
“Ngati munthu apita patsogolo molimba mtima m’kuunika koma wasiya kusamalira ena, cholinga cha kuunikako chimakhala chopanda pake. Mulungu akatipatsa kuunika, amatipatsa kuti tichite chinachake m’kuunikaku.”